Жаңалықтар

Ескелді ауданында көпбалалы отбасыларға үй берілді

Бүгін Ескелді ауданында 3 көпбалалы отбасы баспаналы болды, деп хабарлайды TINFO.KZ. Пәтерлердің кілті салтанатты түрде табыс етілді. Аудан әкімдігінің хабарлауынша, осыған дейін «Нұрлы жер» бағдарламасы бойынша өңірде 25 отбасы қоныс тойын тойлады. Фото: Ескелді ауданының әкімдігі.

Талдықорғанда оқушыларға кітап оқудың маңыздылығы айтылды

Талдықорған қаласы В.Маяковский атындағы орталық кітапханада «Кітап білім -бұлағы»  атты арнайы тәрбие сағаты өтті, деп хабарлайды TINFO.KZ. Шара Еріктілер жылы шеңберіндегі іс-шаралар аясында және №14 мектеп гимназиясының 6б сынып оқушыларының ата-аналарымен ұйымдастырылған. «Кітап – білімнің қайнар көзі. Кітап оқу адамның ой-өрісін кеңейтіп, қаблетін шыңдайды. Жақсы кітап – жан азығы. Әр оқырман кітап оқу арқылы кең әлемнің тылсым  сырына қанығып, баға жетпес рухани құндылықтарды өз бойына сіңіре алады. Сондықтанда қай дәуірде болсын кітаптың орны ерекше», – дейді мамандар. Тәрбие сағатында кітап оқудың артықшылығы жан-жақты түсіндіріліп, қаншама кітап қорын сақтап, оқырманға қолайлы орта сыйлап отырған кітапханалардың маңыздылығы атап айтылды. «Қазіргі кезде заман ағымына байланысты кейбір адамдар «кітапханалардың болашағы жоқ» деген пікірде. Бұл әрине жансақ ұғым. Себебі, электронды жүйенің адам денсаулығына келірер зияны жоғары», - деп атап өтті ұйымдастырушылар. Шара барысында оқушылар әр түрлі сұраққа жауап алып, ашық пікір алмасты. «Осындай шараларды өткізу арқылы ата- аналар  оқушылармен ашық қарым-қатынас орнатуды көздейді. Мұндағы мақсат сіз бен біз болып толағай табыстарға жету, және  жас толқынның қажеттіліктері мен көкейдегі ойларын орындауға көмек көрсету» — деді ата-аналар атынан сөз алған Айсұлу ханым.    

2020 жылы Алматы облысында қандай мерейтойлар атап өтіледі?

Биыл Алматы облысында кең көлемде бірқатар мерейтойлар атап өтіледі, деп хабарлайды TINFO.KZ. Бұл туралы Jetisy Media ақпараттық алаңында облыстық мәдениет, архивтер және құжаттама басқармасының басшысы Мәрлен Көлбаев хабарлады. «Биылғы жылы Абай Құнанбаевтың 175, Әбу Нәсір әл-Фарабидің 1150, Орақты батырдың 600, Шоқан Уәлихановтың 185, Елбасы Нұрсұлтан Назарбаевтың туғанына  80 жыл мерейтойы тойланса, Ұлы Жеңіске 75 жыл толуын ел болып атап өтпек. Ұлы Отан соғысына арналып салынған ескерткіштер жөндеуден өтіп, кітаптар шығарылады. Ұлы тұлғаларға арналған танымдық кештер, халықтық театрлар фестивалі жыл бойы жалғасады», - дейді Мәрлен Көлбаев. Сонымен қатар, Талдықорғанда Абайдың ескерткіші ашылады. Ақпан, наурыз айларынның аралығында республика бойынша ақындар арасында һәкім Абайға арналған өлеңдерден байқау ұйымдастырылмақ. «Абай мен Әл-Фарабиге қатысты облыстық Бикен Римова атындағы драма театрында тұғырлы тұлғалардың өмірі мен шығармашылығына қатысты ақпан мен сәуір айларында  сахналық қойылым көрерменге жол тартады», - деп атап өтті басқарма басшысы. 2019 жылы өңірдің мәдениет саласында 50 мыңнан аса түрлі мәдени шаралар өткізілген.

Алматы облысында тұңғыш рет әкімдік жанынан отбасылық кеңес бөлмесі ашылды

Бүгін Сарқан ауданы әкімдігі жанындағы отбасылық кеңес бөлмесі жұмысын бастады, деп хабарлайды TINFO.KZ өңір әкімінің баспасөз қызметіне сілтеме жасап. Айта кетейік, отбасылық кеңес бөлмесі облыс көлемінде ең бірінші болып ашылды. Отбасылық кеңес бөлмесінің негізгі - мақсаты жастар арасында көптеп орын алып жатқан ажырасудың алдын алу, балалардың толық жанұяда тәрбиеленуіне ат салысу, отбасының тұтастығын сақтау. Отбасылық кеңес бөлмесінің ашылу рәсіміне аудан басшысы Марат Мелісұлы арнайы келіп, жұмыстарына табыс тіледі. Сарқан ауданы бойынша Отбасылық кеңестің кеңесшісі болып Алматы облысы мәслихатының депутаты, ардагер ұстаз Жамал Құлақметова тағайындалды. Жамал Ағабдолдақызының айтуынша, «Тәуелсіз еліміздің тұғыры биік болуы және мемлекетіміздің дамыған 30 елдің қатарына кіруі үшін әрбір жанұяның тыныштығы, берік болуы біздер үшін өте маңызды. Біздің тараптан, отбасылық өмірдің үлкен өмірлік жол екендігін әрбір жасқа түсіндіріп, үйленерден бұрын жас жұптарға жақсы кеңестер беретін болсақ, түсінбеушілік, ажырасу, баланың тағдыры, жалпы отбасылық мәселелердің дау-дамайсыз шешілетіндігіне сенімдімін», - деді ол. Аталған кеңес бөлмесі Сарқан қаласы, М.Тынышбаев көшесі №8, Балалар шығармашылық үйінің, бірінші қабатындағы №1 кабинетте орналасқан.  

Абай және XXI ғасырдағы Қазақстан

Биыл Абай Құнанбайұлының туғанына 175 жыл толады. Халқы­мыздың ұлы перзентінің мерейтойын лайықты атап өту үшін ар­найы құрылған комиссия дайын­­дық жұмыстарын бастап кетті. Мемлекет көлемінде және халық­аралық деңгейде ауқымды іс-шаралар ұйымдастыру жоспарланып отыр. Бірақ мұның бәрі той тойлау үшін емес, ой-өрісімізді кеңейтіп, рухани тұрғыдан дамуы­мыз үшін өткізілмек. Абай Құнанбайұлы ғұлама, ойшыл, ақын, ағартушы, ұлттың жаңа әдебиетінің негізін қалаушы, аудармашы, композитор ретінде ел тарихында өшпес із қалдырғаны сөзсіз. Оның өлеңдері мен қара сөздерінде ұлт болмысы, бітімі, тұрмысы, тіршілігі, дүниетанымы, мінезі, жаны, діні, ділі, тілі, рухы көрініс тауып, кейін Абай әлемі деген бірегей құбылыс ретінде баға­ланды. Өткен жылы Абайдың шығар­ма­ларынан үзінді оқу эстафетасы өтті. Ләйлім атты оқушы қыз ұсынған бұл елдік шараға мен де қатысып, қолдау көрсеттім. Мектеп оқушыларынан ел азаматтарына, тіпті әлемдік деңгейдегі танымал тұлғаларға дейін зор қызығушылық танытып, лезде іліп әкеткен бұл бас­тама бірнеше айға ұласты. Соның арқасында бүкіл Қазақ­стан Абай мұрасын тағы бір зерделеп шықты. Бұл – Абайға деген құрмет әрі ұрпақты тәрбиелеудің тиімді тәсілі. Абай жырларын оқу челленджі биыл, ақын мерейтойы тұсында жаңаша жанданады деп сенемін. Елбасы Нұрсұлтан Әбішұлы Назарбаев «Болашаққа бағдар: рухани жаңғыру» атты мақаласында қоғамдық сананы қайта түлетудің маңыздылығы туралы айтты. Ұлттық сананы сақтау және оны заман талабына бейімдеу мемле­кеттік маңызы бар мәселеге айналды. Өйткені сананы жаңғырту арқылы ХХІ ғасырда еліміздің тың серпінмен дамуына жол ашамыз. Осы орайда Абай мұрасының тигізер пайдасы зор деп есептеймін. Ұлы ақынның шығармалары бү­гін де өзектілігін жоғалтқан жоқ. Абай­дың ой-тұжырымдары барша­мызға қашанда рухани азық бола алады. Сондықтан ұлтымызды жаңғыр­ту ісінде оның еңбектерін басшы­лыққа алып, ұтымды пайдалану жайын тағы бір мәрте ой елегінен өткізген жөн. Мен бұл мақалада Абай сөзі­нің бүгінгі заманымыз үшін көкей­кестілігі, ақын шығарма­лары­нан халқымыз қандай тағылым алу­ға тиіс екендігі жөнінде жұртшы­лық­пен ой бөліскім келеді.  Ұлттық болмыстың үлгісі Жаңғыру – өткеннен қол үзіп, тек жаңа құндылықтарға жол ашу деген сөз емес. Шын мәнінде, бұл – ұлттық мұра­ларымызды бүгінгі оң үрдістермен үйлестіре дамытуды көздейтін құбы­лыс. Бұл ретте, біз Абайды айналып өте алмаймыз. Себебі ұлы ойшыл осыдан бір ғасырдан астам уақыт бұрын ұлтты жаңғыруға, жаңаруға, жаңа өмірге бейім болуға шақырған. Елбасымыздың: «Заманалар ауысып, дүние дидары өзгерсе де, хал­қы­мыздың Абайға көңілі айнымайды, қайта уақыт өткен сайын оның ұлы­лығының тың қырларын ашып, жаңа сырларына қаныға түседі. Абай өзінің туған халқымен мәңгі-бақи бірге жасайды, ғасырлар бойы Қазақ елін, қазағын биіктерге, асқар асу­ларға шақыра береді», – деген өнегелі сөзі ақын мұрасының мәңгілік өсиет ретінде бағаланатынын айқын аңғартады. Абайдың шығармаларына зер салсақ, оның үнемі елдің алға жылжуына, өсіп-өркендеуіне шын ниетімен тілеулес болғанын, осы идеяны барынша дәріптегенін байқаймыз. Ал ілгерілеудің негізі білім мен ғылымда екенін анық білеміз. Абай қазақтың дамылсыз оқып-үйренгенін бар жан-тәнімен қалады. «Ғылым таппай мақтанба» деп, білімді игермейінше, биіктердің бағына қоймайтынын айтты. Ол «Біз ғылымды сатып мал іздемек емес­піз», – деп тұжырымдап, керісінше, ел дәулетті болуы үшін ғылымды игеру керектігіне назар аударды. Ұлы Абай­дың «Пайда ойлама, ар ойла, Талап қыл артық білуге» деген өнегелі өсиетін де осы тұрғыдан ұғынуымыз қажет. Бұл тұжырымдар қазір де аса өзекті. Тіпті бұрынғыдан да зор маңызға ие болып отыр. Себебі ХХІ ғасырдағы ғылымның мақсаты биікке ұмтылу, алысқа құлаш сермеу екенін көріп отырмыз. Ал біздің міндетіміз – осы ілгері көшке ілесіп қана қоймай, алдыңғы қатардан орын алу. Ол үшін ең алдымен, білім беру саласын заманға сай дамытуымыз керек. Сол мақсатта ауқымды жұмыстар атқа­рыл­ғанымен, отандық білім беру ісінде әлі де олқы тұстар бар. Оны жетіл­діру жолдарын сайлау алдындағы бағдар­ламамда және өткен жылғы тамыз конференциясында нақты атап көрсеттім. «Педагог мәртебесі туралы» заңның қабылдануы – осы бағыттағы игі бас­тамалардың бірі. Бұл – сапалы білім беру ісін жетілдіруге арналған қадам. Жалпы кез келген қоғамда ұстаз­дың орны бөлек. Мұғалімдер білімді әрі саналы ұрпақ тәрбиелеу ісінде аса маңызды рөл атқарады. Ұстазға құр­мет көрсетіп, қадірлеу – бәріміздің мін­де­тіміз. Сондықтан мемлекет мұғалім мамандығының мәртебесін көтеріп, алаңсыз жұмыс істеуіне жағдай жасауы керек. Абай айрықша дәріптеген игілікті істің бірі – тіл үйрену. Ақын жиырма бесінші қара сөзінде өзге тілдің адамға не беретініне тоқталып: «Әрбіреудің тілін, өнерін білген кісі оныменен бірдейлік дағуасына кіреді, аса арсыздана жалынбайды», – дейді. Демек, өзімізден озық тұрған жұрт­пен деңгейлес болу үшін де оның тілін меңгерудің маңызы зор. Ал қазіргідей жаңа тарихи жағ­дайда бәріміз ана тіліміздің дамуы мен дәріптелуіне назар аударып, оның мәртебесін арттыруымыз керек. Сонымен қатар ағылшын тілін үйре­нуге де басымдық беру қажет. Жаста­рымыз неғұрлым көп тілді меңгерсе, соғұрлым мүмкіндігі кеңейеді. Бірақ олардың ана тілін білуіне баса мән берген жөн. Өскелең ұрпақ, Абай айтқандай, ғылымды толық игерсе, өз тілін құрметтесе әрі шын мәнінде полиглот болса, ұлтымызға тек игілік әкелері сөзсіз. Қазір әлем күн сайын емес, сағат сайын өзгеруде. Барлық салада жаңа міндеттер мен тың талаптар қойылуда. Ғылымдағы жаңалықтар адамды алға жетелейді. Ақыл-оймен ғана озатын кезең келді. Заман көшіне ілесіп, ілгері жылжу үшін біз сананың ашықтығын қамтамасыз етуіміз керек. Бұл қадам өркениеттің озық тұстарын ұлттық мүддемен үйлестіре білуді талап етеді. Мұндай кезде өзіміздің таптаурын, жадағай әдеттерімізден бас тартуымыз қажет. Абайдың кейбір қарекеттерге көңілі толмай, «Терең ой, терең ғылым іздемейді, Өтірік пен өсекті жүндей сабап» деп үнемі сыни көзбен қарауының себебі осында. Ақын ел-жұртын түрлі өнерді игеруге үгіттеді. Соның бәрі уақыттың талабы екенін ол анық аңғарып, ұлтына ертерек үн қатты. Тіпті қазір айтып жүрген интеллектуалды ұлт қалыптастыру идеясы Абайдан бастау алды деуге болады. Ұлы ойшыл әр сөзімен ұлттың өресін өсіруді көздеді. Сондықтан Абайды терең тануға баса мән бергеніміз жөн. Абайды тану – адамның өзін-өзі тануы. Адамның өзін-өзі тануы және үнемі дамып отыруы, ғылымға, білімге басымдық беруі – кемелдіктің көрінісі. Интеллектуалды ұлт дегеніміз де – осы. Осыған орай, Абай сөзі ұрпақтың бағыт алатын темірқазығына айналуы қажет. Абай қазақтың әр баласын ұлт­жанды азамат етіп тәрбиелеуге ша­қыр­ды. Оның мұрасы – парасатты пат­риотизмнің мектебі, елдікті қадірлеудің негізі. Сондықтан азаматтарымыздың көзі ашық болсын десек, Абайды оқу­дан, ақын өлеңін жаттаудан жалық­паған жөн. Біз елді, ұлтты Абайша сүюді үйре­нуіміз керек. Ұлы ақын ұлтының кемшілігін қатты сынаса да, тек бір ғана ойды – қазағын, халқын төрге жетелеуді мақсат тұтты. Абайдың мол мұрасы қазақ ұлтының жаңа сапасын қалыптастыруға қызмет етеді. Оның шығармаларындағы ой-тұжырымдар әрбір жастың бойында халқына, елі мен жеріне деген патриоттық сезімді орнықтырады. Сондықтан хакім Абай еңбектерінің нәрін өскелең ұрпақтың санасына сіңіру және өмірлік азығына айналдыру – ұлтты жаңғыртуға жол ашатын маңызды қадамның бірі. Мемлекет ісінің мүдделесі Біз егемен ел ретінде өсіп-өркен­деуі­міз үшін мемлекеттілігімізді нығай­туымыз керек. Заң үстемдігін және қоғамдық тәртіпті сақтау баршаға ортақ міндет екенін ұғынған жөн. Халықтың билікке деген құрметі болмаса – елдігімізге сын. Сондықтан азаматтарға, әсіресе, жастарға мемлекетті сыйлаудың мән-ма­ңы­зын түсіндіру қажет. Осы ретте тағы да Абайдың мұрасына зейін қойған абзал. Ұлы ақын өзінің шығармаларында елдік мұратты асқақтатып, ұлт бірлігін биіктетті. Ол әділетті қоғам құру идеясын кө­тер­ген. Демек, Абайдың көз­қарастары ХХІ ғасырдағы Қазақстан қоғамы және оның береке-бірлігі үшін аса құнды. Хакім Абайдың ұстанымдары өркениетті мемлекет қағидаларымен үндеседі. Заң үстемдігі, биліктің ашықтығы мен халық алдында есеп беруі жоғары деңгейде болып, мемлекет ісіне азаматтық қоғам өкілдері белсене араласқан жағдайда ғана әділеттілік берік орнығады. Менің «Халық үніне құлақ асатын мемлекет» атты тұжырымдамам дәл осы әділетті қоғам идеясын дамыту мақсатымен ұсынылды. Билік пен қоғам арасындағы сындарлы диалог мемлекетке деген сенімді нығайта түседі. Үкімет мүшелері, соның ішінде министрлер мен әкімдер мемлекеттік және қоғамдық маңызы бар мәселелерге қатысты шешім қабыл­даған кезде азаматтардың ұсы­ныс­­тары мен тілектерін ескеруі керек. Мұны Абай меңзеген әділетті қоғам қа­­лып­­тас­тырудың бірден-бір шарты деп білемін. Ұлы ақын «Келелі кеңес жоғалды, Ел сыбырды қолға алды» дегенді бекер айтқан жоқ. Елге билік жүргізетіндерге жұрттың көңілі толмайтынын да аңғартады. «Сыбырдан басқа сыры жоқ, Шаруаға қыры жоқ» замандастарымыз көбеймес үшін билік халыққа әрдайым құлақ түріп отырғаны жөн. Мемлекет пен қоғам өкілдері түйткілді мәселелерді бірге талқылап, шешімін табу мақсатында Ұлттық қоғамдық сенім кеңесін құрдық. Кеңес формальды сипат алып кетпеуі үшін оның мүшелерімен арнайы кездесіп, жұмысын жіті қадағалап отырмын. Абай шығармаларында меритократия мәселесіне де айрықша мән берілген. Ол адамды мәртебесіне қа­рай емес, талабы мен еңбегіне қарап баға­лаған. Ұлы ақын қазақ жастарына жөн-жоба көрсетіп, бағыт-бағдар берген. Қазір Қазақстанда саяси жаңғыру үдерісі жүріп жатыр. Елбасының қолдауымен билікке басшылардың жаңа буыны келе бастады. Соған қарамастан, елімізде түбегейлі саяси өзгеріс керек деген ойлар да жиі айтылып жатады. Бірақ бұл мәселе бойынша ұлттық мәмілеге келудің, мемлекет мүмкіндіктерін шынайы баға­лаудың және жүктелген міндетке жауап­кер­шілікпен қараудың маңызы зор. Өзгеріс деп байбалам салатындар еліміздің болашағын байыптамайды, жай ғана популистік идеяларға табан тірейді. Популизм теріс тенденция ретінде дүниежүзілік сипат алды. Әлемнің түкпір-түкпірінде нақты стратегиясы жоқ, тек жалаң ұрандар арқылы билікке жеткісі келетін топтардың дауысы жиі естілуде. Осындай даңғазаға құмар адамдар туралы Абай: «Қу тілменен құтыртып, Кетер бір күн отыртып», – дейді. Расында, бұл – кез келген елдің дамуын кенже қалдыратын, ұлттың бірегейлігін әлсірететін қауіпті үрдіс. Бізге, Абай айтқандай, артық мақ­танға салыну, өзгені қор, өзімізді зор санау, дау қуу әсте жараспайды. Әр қадамымызды анық басып, әлемде және елімізде болып жатқан оқиғаларды байыппен сараптай білуіміз қажет. Тұрақтылық пен дамуымыздың кепілі болған татулық пен бірлікті бәрінен жоғары қойған абзал. Мемлекет мүддесін көздесек, әуелі сабақтастық сақталып, төгілген тер мен атқарған еңбектің далаға кетпеуін ойлайық. Осындай саясат жүргізген кезде ғана барлық стратегиялық мақсаттарымызға қол жеткізіп, Қазақстанды озық дамы­ған мемлекеттердің қатарына қоса аламыз. Жаңа қоғамның жанашыры Жаңа Қазақстанның өзегін жаңа қоғам құрайтыны анық. Бұл ретте, ең алдымен, ұлтымыздың қадір-қасиетін арттырып, халқымыздың бәсекеге қабілет­тілігін жетілдіруге баса мән беруіміз керек. Сондай-ақ қоғамның дамуына кедергі келтіретін, береке-бірлігі­мізге іріткі салатын жағымсыз қасиеттерден арылу қажет. Бүгінде дүние жүзінің бірқатар интел­лектуалдары классикалық капита­лизм дағдарысқа тап болғанын ескертіп, оның болашағына күмәнмен қарайды. Себебі әлемде бай мен кедейдің, білім­ді мен білімсіздің, қала мен ауыл­­дың арасы алшақтап кетті. Бұл үде­ріс­тің қарқыны барған сайын күшейіп келеді. Бизнес тек пайда көз­десе, бі­лім­ділер бөлек орта қалып­тастырды, әр­қайсысы өздері үшін ғана жауап­кершілік арқалайтын болды. Қалалар тез өсіп-өркендеп, шағын елді мекендердің дамуы тұралады. Ғалымдар мұның барлығы әлеумет­тік жауапкершіліктің әлсірегенінен деп есептейді. Әлеуметтік жауапкершілік қайт­кенде орнына келеді? Әрине, бұл – оңай шаруа емес. Осы күрделі мәселенің шешімін Абайдың «Толық адам» формуласынан іздеген жөн. «Толық адам» деген сөз ағылшын тіліндегі «A man of integrity» түсінігіне сай келеді. Бұл – тек өте ілкімді, өзіне сенімді, ізгілік пен жақсылыққа ұмтылатын адамдарға ғана тән сипаттама. Қазір тарап жатқан осы ұғымды Абай сонау он тоғызыншы ғасырдың өзінде-ақ түсіндіріп айтты. Адам өмірі тұтасымен түрлі қарым-қатынастардан құралады. Онсыз адам қоғамнан бөлініп қалмақ. Ал қа­рым-қатынас міндетті түрде өзара жауап­кершілікті туғызады. Бұл жауапкер­шілік қара басының қамын биік қоятын өзімшілдік араласқан кезде бұзылады. Сондықтан Абай: «Ақыл, қайрат, жүректі бірдей ұста, Сонда толық бо­ласың елден бөлек», деп адамға нұрлы ақыл мен ыстық қайраттан бөлек, жылы жүрек керек екенін айтады. Осы үш ұғымды ол үнемі бірлікте қарастырады, бірақ алдыңғы екеуі жүрекке бағынуы керек деп есептейді. Бұл – қазақ халқының өмірлік философиясы. Осындай таным-түсінікпен өмір сүрген халқымыз өзі қиын жағдайда отырып, өзге ұлттарды бауырына басқан. Өзі асқа жарымай қиналса да, бір тілім нанын бөлісіп жеуді парыз санаған. Үнемі үлкенге құрмет, кішіге ізет көрсетіп, сүрінгенге сүйеу, жығылғанға демеу бола білген. Осы құндылықтарды дәріптеп, бүгінге жеткізу арқылы халқымыз өзінің ұлт ретінде сақталуы үшін барын салған. Біз Абайдың «толық адам» тұжыры­мын қайта зерделеуіміз керек. Бұл бағытта ғалымдарымыз тың зерттеу­лерді қолға алуы қажет. «Толық адам» концепциясы, шындап келген­де, өмірі­міздің кез келген саласының, мемле­кетті басқару мен білім жүйе­сінің, биз­нес пен отбасы институттары­ның негіз­гі тұғырына айналуы керек деп есеп­теймін. Абай шығармашылығына арқау болған тақырыптың бірі – масыл­дықпен күрес. Ақын үнемі уайымсыз салғырттыққа, ойын-күлкіге салын­бай, сергек болуға үндейді. Оны ұдайы ең­бек арқылы шыңдап отыруды құп көре­ді. Сонымен қатар орынды әре­кет­­тің уайым-қайғыны жеңетінін дәлел­­деп, масылдықпен күрестің психо­ло­­гия­лық қырларына терең бойлайды. Қазір біз көп айтып жүрген эмоцио­нал­ды интеллектіге де сол тұста назар ау­дар­ды. Мақтан мен масылдық психо­ло­­гия­дан арылып, қайраттанып еңбек етуді, талаптанып білім іздеуді насихат­таған. Абай өлеңдеріндегі «Еңбек етсең ерінбей, Тояды қарның тіленбей», «Тамағы тоқтық, Жұмысы жоқтық, Аздырар адам баласын», «Өзіңе сен, өзіңді алып шығар, Еңбегің мен ақылың екі жақтап» – деген қазыналы ойлар бәрімізге жақсы таныс. Әр адам осы түйінді тұжырымдарды санасына берік тоқып, өзінің тынымсыз, адал ең­бегі­мен айналасына үлгі болуы керек. Халқымыз еңбектің қадірін біледі. Біз ата-аналарымыздың тылдағы ауыр еңбегі жеңіске жетелеген орасан күшке айналғанын ұмытқан жоқпыз. Қазір де қарапайым еңбек адамдарының үлгілі істері жетерлік. Жақында солардың біразы мемлекеттік наградалармен марапатталды. Ең бастысы, бүгінгідей бейбіт кезең­де әр азамат өзінің еселі еңбегі еліміз­дің экономикасын ілгерілетуге тікелей ықпал ететінін түсінуі қажет. Абайды өз заманындағы іскерлік­тің ұйытқысы, еңбекқорлықтың мо­ти­ваторы деуге болады. Ұлы ой­шыл шығармаларында кәсіптен нә­сіп тапқандарды, шаруақорлыққа үйре­ну дағдыларын үлгі етеді. Ол тұрмыс сапасын жақсарту үшін еңбек ету­дің жаңа тәсілдерін меңгеруге шақы­рады. Сонымен қатар ақын баста­машыл­дықты, кәсіптегі адалдықты жоғары қояды. Мысалы, өзінің оныншы қа­ра сөзінде «Ерінбей еңбек қылса, түңіл­мей іздесе, орнын тауып істесе, кім бай болмайды?», деп тұжырым жасайды. Абайдың ойынша, табыс табу үшін қолөнер үйрену керек. Себебі «мал жұтайды, өнер жұтамайды» (отыз үшінші қара сөз). Ұлы ақынның бұл ойлары бүгінгі Қазақстан қоғамы үшін де өзекті деп санаймын. Сондықтан біз бүгінгі таңда шикізатқа тәуелділік психологиясынан арылуды, шағын және орта бизнесті барынша өркендетуді негізгі басымдықтың бірі ретінде белгілеп отырмыз. Әлемдік мәдениеттің тұлғасы Қазіргі өркениетті мемлекеттердің барлығы дерлік шоқтығы биік тарихи тұлғаларымен мақтана алады. Олардың қатарында саясаткерлер, мемлекет және қоғам қайраткерлері, қолбасшылар, ақын-жазушылар, өнер және мәдениет майталмандары бар. Қазақ жұрты да біртуар перзенттерден кенде емес. Солардың ішінде Абайдың орны ерекше. Бірақ біз ұлы ойшылымызды жаһан жұртына лайықты деңгейде таныта алмай келеміз. Мен көп жылғы дипломатиялық қызме­тімде басқа елдердің саясаткер­лерімен, түрлі сала мамандарымен жиі кездестім. Шетелдіктермен адамзатқа ортақ көптеген түйткілді мәселе туралы пікір алмасып, ой бөлістім. Жалпы, олар Қазақстанның саяси және экономикалық жетістіктері жөнінде жақсы біледі. Ал рухани және мәдени құндылықтарымызбен жете таныс емес. Осы орайда «Неге қазақтың бітім-болмысын, мәдениетін Абай арқылы танытпаймыз?», деген сұрақ туындайды. Ғұлама Абай – қазақ топырағынан шыққан әлемдік деңгейдегі кемеңгер. Ол күллі адамзат баласына ақыл-ойдың жемісін сыйлады. Абайдың ақындық қуатының терең тамырына үңілген зерттеушілеріміз оның қазақ фольклорынан, Шығыс пен Батыстың сөз өнерінен, орыс әде­биетінен, тарихи еңбектерден сарқыл­мас нәр алғанын айтады. Абайдың асқан ойшылдығы оның діни талғам-танымынан да айқын көрінеді. «Алланың өзі де рас, сөзі де рас, Рас сөз ешуақытта жалған болмас», дейді. Бұл ой-тұжырымға Шығыс пен Батыс философтарының еңбектерін терең біліп, зерттеп, зерделеп барып жеткені анық. Ал отыз сегізінші қара сөзінде Аллаға деген көзқарасын толық білдіреді. Абайдың рухани өресіне баға берген дінтанушы философ ғалымдар оның «кәміл мұсылман» ұғымына ерекше назар аударады. «Кәміл мұсылман» ұғымы тек қазаққа ғана емес, бүкіл мұ­сылман әлеміне қатысты айтылса керек. Міне, біздің ойшыл Абай, хакім Абай – әлемдік деңгейде осы діни көзқарасы арқылы да биіктей беретін тұлға. Елордада барлық діннің басын қосып, дәстүрлі жиын өткізіп келе жатқанымызды білесіздер. Мұндай іс-шаралардың мақсаты мен ұлы Абай ұстанымының арасында өзара үйлесімділік бар. Ақынның барша адамзат баласының жан дүниесінің тазалығын сақтауға деген ниеті бәрімізге ой салады. М.Әуезовтің «Абай жолы» романы арқылы Абай бейнесі көркем образ ретінде әлем әдебиетінде жоғары бағаланғаны белгілі. Бірақ бұл – Абайды танудың бір қыры ғана. Нағыз Абайды, ақын Абайды тану үшін оның өлеңдері мен қара сөздерінде айтылған ой-тұжырымдардың мән-маңызы ашылуы керек. Ол әлемнің кең таралған негізгі тілдеріне барлық бояуын сақтай отырып аударылуы тиіс. Бұған біз толық қол жеткізе алдық деп айту қиын. Нағыз ұлт ақындарын өзге тілдерге аудару – оңай шаруа емес. Аудармашы да сол ойшылдың деңгейіндегі талант болуы керек. Біздің абайтанушы ғалымдарымыз, тіл мамандары мен жанашыр азаматтар осы мәселеге ерекше мән бергені жөн. Елбасы Нұрсұлтан Әбішұлы Назарбаев: «Абай – қазақ халқының рухани қазынасына өлшеусіз үлес қосқан ғұлама ғана емес, сонымен қатар ол қазақ халқының ел болуы жолында ұлан-ғайыр еңбек еткен данагер. Абай – әлемдік деңгейдегі ойшыл­дардың қатарындағы ғажайып тұлға», деген болатын. Шынында да, дана ақын шығармалары тек қазақтың ғана емес, бүкіл адамзат баласының рухани өмірін жан-жақты байыта алады. Өйткені Абай туындыларының мазмұны жалпы­адамзаттық құндылықтарға толы. Оның қара сөздері – әлем халық­­тарының ортақ қазынасы. Бұл – клас­си­калық үлгідегі өнегелі ойлар шоғыры. Нақыл сөз, ғибратты сөз, ғақлия сөздер деп әрқилы аталғанымен, бұл – ерекше жанр. Абай өзінің қара сөздерінде адамзат баласына ортақ мұраларды дәріптей отырып, рухани биікке құлаш сермеп, алысқа қанат қаққанын көрсетеді. Оның қара сөздерінің арқауы – кісілік, мәдениет, ізгілік. Хакім Абайдың қара сөздеріне балама еңбек іздесек, француз ойшылы Монтеньнің жазбалары ойға оралады. Десек те, Монтень өз болмысы мен адам тұлғасы жөнінде көбірек ой толғаса, Абай қара сөздерінің бас­ты миссиясы – ойлану, өзгеге ой салу, мақсатты ұстанымға айналдыру. Демек, ұлы ойшылдың қара сөздері – аса құнды еңбек. Әлемдік мәдениетте Абайды қанша­лықты жоғары дәрежеде таныта алсақ, ұлтымыздың да мерейін соншалықты асқақтата түсеміз. Бүгінгі жаһандану дәуірінде, ақпараттық технологиялар заманында Абай сөзі баршаға ой салуы тиіс. Дүние жүзінде ғылым мен білімнің түрлі салаларын дамытуға зор үлес қосып, бүкіл адамзатқа ортақ ойшыл ретінде танылған тұлғалар баршылық. Мысалы, Қытай дегенде Лао-цзы мен Конфуций, Ресей дегенде Достоевский мен Толстой, Франция дегенде Вольтер мен Руссо бірден ойға келеді. Сол сияқты шетелдіктердің бәрі бірдей Қазақстан дегенде бірден Абайдың есімін атайтындай дәрежеге жетуіміз керек. Өзге жұрт «Қазақ халқы – Абайдың халқы» деп бізге ілтипат білдіріп отырса, зор мәртебе болары анық. Абайды қалай дәріптесек те жарасады. Оның ғибратты ғұмыры мен шынайы шығармашылығы – қазақ халқына ғана емес, жаһан жұртына да үлгі-өнеге. Абайдың адам мен қоғам, білім мен ғылым, дін мен дәстүр, табиғат пен қоршаған орта, мемлекет пен билік, тіл мен қарым-қатынас туралы айтқан ой-тұжы­рымдары ғасырлар өтсе де маңызын жоғалтпайды. Өйткені ақынның мұрасы – бүкіл адамзат баласының рухани азығы. Қазақ елі барда Абай есімі асқақтай береді. Оның асыл сөздерін рухани байлығымыз ретінде жоғары ұстасақ, туған еліміздің әлем алдындағы абыройы арта берері сөзсіз. Ең алдымен Абайды ұлтымыздың мәдени капиталы ретінде насихаттауымыз керек. Өркениетті елдер қазақтың болмыс-бітімін, мәдениеті мен әдебиетін, рухани өресін әлемдік деңгейдегі біртуар перзенттерінің дәрежесімен, танымалдығымен ба­ғалай­тынын ұмытпайық. Сондықтан Абайды жаңа Қазақстанның бренді ретінде әлем жұртшылығына кеңінен таныс­тыру қажет. Бұл – бүгінгі ұрпақ­тың қастерлі борышы.   Торқалы тойдың тағылымы Біз ұлттық сананы жаңғыртамыз және бәсекеге қабілетті ұлт қалып­тастырамыз десек, Абайдың шығар­маларын мұқият оқуымыз керек. Оның қоғамдағы түрлі үдерістерге қатысты көзқарасы бүгінгі Қазақстан үшін аса пайдалы. Өз заманының ғана емес, қазіргі қоғамның да бейнесін танытқан Абай – елдік мұраттың айнымас темірқазығы. Әр қазақтың төрінде домбыра тұрсын деген ұғым қалыптасқанын бәріміз жақсы білеміз. Сол сияқты әр шаңырақта Абайдың кітабы мен Мұхтар Әуезовтің «Абай жолы» романы тұруы керек деп санаймын. Келер ұрпақ Абайдың сара жолын жалғауы тиіс. Бұл – ұлы ақын арманының орындалуы. Сондықтан біз Абайдың ойынан да, тойынан да тағылым алуға тиіспіз. Биыл Абайдың 175 жылдығына орай халықаралық, республикалық және аймақтық деңгейде 500-ден астам іс-шара ұйымдастырылады. Тамыз айында Семей қаласында ЮНЕСКО-мен бірлесіп өткізілетін «Абай мұрасы және әлемдік руханият» атты халықаралық ғылыми-практикалық конференция ең басты шараға айналады. Сондай-ақ қазан айында Нұр-Сұлтан қаласында «Абай және рухани жаңғыру мәселелері» деген тақырыпта халықаралық конференция өтеді. Бұл жиындарда Абайдың тұлғасы мен мұрасы жан-жақты зерделеніп, оның шығармашылығын ХХІ ғасырдағы жаңа Қазақстанның игілігіне пайдалануға жол ашылады. Маңызды жобаның бірі – ұлы ақынның шығармаларын он тілге аударып, басып шығару. Атап айтқанда, Абай еңбектері ағылшын, араб, жапон, испан, итальян, қытай, неміс, орыс, түрік, француз тілдеріне тәржі­ма­ланады. Ақынның өмірі, мұрасы, қазақ мәдениетін дамытудағы рөлі туралы бірнеше деректі фильм және «Абай» телесериалы түсіріледі. Ақын тойынан өнер саласы да тыс қалмайды. Республикалық және ха­лық­аралық деңгейде театр және музыка фестивальдары өтеді. Биылғы бәй­гелер Абай шығармашылығына ар­на­лады. Әдебиет және өнер саласын­дағы үздік шығармаларға берілетін мем­ле­кет­тік сыйлық енді Абай атын­дағы мем­лекеттік сыйлық деп аталатын болады. Абайдың тұлғасы мен мұра­сын ұлық­тау шетелдерде де жалға­сады. Ресей­дегі, Франциядағы, Ұлыбри­­та­ния­да­ғы және басқа да мемлекеттердегі Қазақ­­станның елшіліктері жанынан «Абай орталықтарын» құру жос­пар­ла­нып отыр. Бұл мәдени іс-шараларды ысы­рап­­шылдыққа жол бермей ұйым­дас­тыру қажет. Шығыс Қазақстан облысының Ақ­шоқы елді мекеніндегі Құнанбай Өскен­­байұлы әулетінің қорымы абаттанды­рылады. Сонымен қатар Абай тұл­ғасын жоға­ры дәрежеде дәріптеу үшін Үкімет мына­дай шараларды қолға алуы керек деп есептеймін: Семей өңірі – қазақ тарихындағы киелі өлкенің бірі. Сондықтан елдің рухани дамуында ерекше орны бар Семей қа­ласын тарихи орталық ретінде белгі­леген жөн. Ұлы Абай мен Шәкәрім­нің, Мұхтар Әуезовтің кіндік қаны там­ған өңір айрықша құрметке лайық. Осы­ған орай шаһарды әлеуметтік-эко­но­ми­калық тұрғыдан кешенді түрде дамы­тып, ондағы тарихи-мәдени нысандар­ды жаңа талапқа сай жаңғыртамыз. Үкі­метке бұл мәселеге байланысты тиісті шаралар қабылдауды тапсырамын. Мерейтой жылы аясында Абайдың қастерлі мекені – әйгілі Жидебайды абат­тандырып, ұлы ақынның рухына тағ­зым етуге келетін жұртшылыққа қолай­лы жағдай жасау қажет. Сонымен қатар Абайдың «Жиде­бай-Бөрілі» мемлекеттік тарихи-мә­дени және әдеби-мемориалдық қорық-музейіне ерекше көңіл бөліп, ғылыми-танымдық жұмыстармен айналысатын орталыққа айналдыру керек. Жидебайда музейге арнайы лайық­талған «Абай мұрасы» атты жаңа ғи­марат салу қажет. 1918 жылы Семей қаласында Мұхтар Әуезов пен Жүсіпбек Аймауытов негі­зін қалаған, 1992 жылдан бері қайта шыға бастаған «Абай» журналына мемлекет тарапынан қолдау көрсету керек. Осы және басқа да ауқымды шаралар ұлы Абайдың рухына тағзым етіп, оның мол мұрасын дәріптеу үшін өткі­зілмек. Ендеше, бүкіл Қазақстан хал­қын осы игі бастамаға белсене атса­лысуға шақырамын. Біз Абайдың 175 жылдық мерейто­йына қоғамдық сананы жаңғыртатын, бір ел, тұтас ұлт болып дамуымызға сер­пін беретін іс-шара ретінде зор мән беріп отырмыз. Бұл тойдың тұсындағы басты мақ­са­тымыз бүкіл халықтың ұлт ұстазы ал­дындағы өзіндік бір есеп беруі іспеттес болуы тиіс деп білемін. Абай сыны – ауыр сын, сындарлы сын. Елбасы бастап, ел қостап, биік белес­терді бағындырдық. Озық елулікке кіреміз деп мақсат қойдық, ол мақсатқа мерзімінен бұрын жеттік. Озық отыздыққа қосылуды меже­ледік. Ол межеге де жетеміз. Сол меже­ге жетуге де бізге Абай мұрасы көмек бере алады. Ендігі мәселе – біз Абай­дың көмегін түсіне алдық па, зерделей аламыз ба? Ұлылықтың тойы ұлт алдындағы ұлы міндеттің үдесінен шығудың жолын іздеуге ұмтылдыруы тиіс. Әр аза­мат осы тойдың алдында еліміз, елдігі­міз жөнінде терең ойланса дейміз. Абай бізге нені аманаттады? Абай бізден не­ні талап етті? Абай бізден нені күтіп еді? Абай елдің қай ісіне сүйініп еді? Сол сүйін­ген ісінен үйрене алдық па? Абай қазақ­тың қай ісіне күйініп еді? Сол күйін­ген ісінен жирене алдық па? Басқа­сын былай қойғанда, ақын айтқан бес асыл істі жүзеге асырып, бес дұшпан­ды бойдан қашырып жатырмыз ба деген ой­дың төңірегінде толғансақ та талай жай­ға қаныға аламыз. Абай мұрасы – біздің ұлт болып бірлесуімізге, ел болып дамуымызға жол ашатын қастерлі құндылық. Жалпы, өмірдің қай саласында да Абайдың ақылын алсақ, айтқанын істесек, ел ретінде еңселенеміз, мемлекет ретінде мұратқа жетеміз. Абай арманы – халық арманы. Халық арманы мен аманатын орындау жолында аянбағанымыз абзал. Абайдың өсиет-өнегесі ХХІ ғасырдағы жаңа Қазақстанды осындай биіктерге жетелейді. Қасым-Жомарт ТОҚАЕВ,  Қазақстан Республикасының Президенті

Сенатор Ләззат Сүлеймен Ақсу ауданының халқымен кездесті

ҚР Парламент Сенатының депутаты Ләззат Сүлеймен Ақсу ауданына жүмыс сапарымен келді, деп хабарлайды TINFO.KZ. Сенатор  Nur Otan партиясының мүшелерімен, мәслихат депутаттарымен, құқық қорғау органдары мен ардагерлер, жастар ұйымдары, бұқаралық ақпарат құралдары өкілдерімен, медиаторлармен, мектеп директорларымен, әлеуметтік сала қызметкерлерімен, мекеме, бөлім басшыларымен, жастар нұсқаушыларымен кездесулер өткізді. Кездесу барысында Сүлеймен Ләззат Жаңылысқызы жұртшылықты Парламент Сенатының 2019 жылғы атқарған жұмысымен, жаңадан қабылданған заң жобаларымен, атап айтқанда, «Педагог мәртебесі» және «Міндетті әлеуметтік сақтандыру» сонымен қатар, аймақтарды дамытудың 2025 жылға дейінгі бағдарламасымен таныстырып, «Ауыл – ел бесігі» жобасы шеңберінде аудан көлемінде атқарылып жатқан жұмыстарға тоқталды. Кездесуде қатысушылар ойларындағы бірнеше өзекті проблемаларды, атап айтқанда шаруа қожалықтарының жұмысына қазіргі таңда аса қажетті шағын механикаландырылған көпсалалы тракторларды елімізде шығару, игерілмей жатқан жерлерді мемлекет иелігіне қайтару, атаулы әлеуметтік көмек тағайындаған кезде отбасының ортақ табысы есебіне зейнетақыны қоспау және тағы басқа мәселелерді көтерді. Ләззат Жаңылысқызы жұмыс сапарын «Ауыл ел бесігі» жобасы аясында жөндеуден өткен «Қарлығаш» балабақшасына барып жалғастырды. Е.Сиқымов атындағы мектеп-интернатының ұжымымен кездесу өткізіп, мектеп ұстаздарына «Педагог мәртебесі» туралы заңды жан-жақты таныстырды. Мемлекет басшысының «Халық үніне құлақ асатын мемлекет» тұжырымдамасы аясында аудан тұрғындарына жеке қабылдау жүргізді.

Cенатор Төлеубек Муқашев Сарқанға келді

Бүгін Сарқан ауданы әкімдігінің мәжіліс залында ҚР Парламентінің Сенат депутаты Төлеубек Муқашев аудандық мәслихат депутаттары, мекеме басшылары, аудандық Қоғамдық Кеңес мүшелері, аудандық ардагерлермен кездесу өткізді, деп хабарлайды TINFO.KZ. Жиында Сенат депутаты президент Жолдауын жүзеге асыру мақсатында бірнеше Заңдарға қол қойылғанын айта келе, «Педагог мәртебесі туралы», «Қазақстан Республикасының кейбір заңнамалық актілеріне қылмыстық және қылмыстық-процестік заңнаманы жетілдіру мәселелері бойынша өзгерістер мен толықтырулар енгізу туралы» және атаулы әлеуметтік көмектің (АӘК) жаңа формат бойынша жәрдем ақы беру сияқты маңызды болып жатқан өзгерістерге кеңінен тоқталып, түсіндірді. Жиында Алматы облыстық мәслихатының депутаты Жамал Құлахметова сөз алып, ұстаздарға қатысты Заң жобасында талқыланған барлық ұсыныстары аталған заңда толық ескерілгендігін атап өтті. Сонымен қатар, аудандық білім бөлімінің басшысы Панар Имангазиева ұстаздардың 16 сағаттық апталық жүктемесінің 2021 жылы ғана енгізілетіндігін айтып, заңда мұғалімдердің зейнетке шығудағы еңбек өтілі ескерілмегенділігіне тоқталса, ал аудандық жұмыспен қамту және әлеуметтік бағдарламалар бөлімінің басшысы Нұржан Адилова АӘК-нің нақты ережелері әлі бекітілмегендігін айтты. Фото: Сарқан ауданы әкімінің баспасөз қызметі.

Зағипа Балиева Талғар ауданында мұғалімдермен кездесті

Талғар ауданына ҚР Парламент Мәжілісінің депутаты Зағипа Балиева Яхянқызы іс-сапармен келіп, бірқатар кездесулер өткізді, деп хабарлайды TINFO.KZ. Сапар барысында Зағипа Яхянқызымен кездесуге Nur Otan партиясының өкілдері, аудандық прокуратура өкілдері, білім бөлімі, балалар мен жасөспірімдер инспекторлары, мектеп директорлары, әлеуметтік сала қызметкерлері, «Жас Отан» жастар қанаты мүшелері, жасұландықтар мен бұқаралық ақпарат өкілдері қатысты. Кездесуде жақында ғана қабылданған «Педагог мәртебесі туралы» Заңындағы өзгерістер талқыланды. Сондай-ақ, депутат қатысушылардың сұрақтарына жауап берді.

Жаңа жылда Алакөл ауданында 6 бала дүниеге келді

Жаңа 2020 жылда Алакөл ауданында 6 сәби дүние есігін ашты, деп хабарлайды TINFO.KZ. Жаңа жылда дүниеге келген нәрестелер мен аналарға құрмет көрсету мақсатында Алакөл ауданы әкімінің орынбасары А.Абдинов пен аудандық аурухананың бас дәрігері А.Бутабаев аудандық перезентхананың жас босанған аналарын нәрестелі болуларымен құттықтап, жаңа туған нәрестеге арналған сыйлықтар мен тәттілерін табыс етті. Сондай-ақ, 1 қаңтарда сағат 11:45 уақытында алтыншы қызын дүниеге алып келген Алия Байболованы да құттықтап, ізгі лебіздерін білдірді. Жас аналар осындай айтулы күні, өздеріне көрсетілген ерекше құрмет үшін Алакөл ауданы әкімдігіне алғыстарын білдіріп, олар үшін бүгінгі күні дүниеге сәбиімен бірге, осындай тосын сыйдың жасалуы екі есе қуаныш екенін жасырмады. Айта кету керек, өткен 2019 жылы ауданда барлығы 903 сәби дүниеге келген, оның үшеуі егіз. Фото: Алакөл ауданының әкімдігі.

Соғыс ардагерлерін Жаңа жылмен құттықтады

Радиоэлектроника және байланыс әскери-инженерлік институтының курсанттары Ұлы Отан соғысының ардагерін Жаңа жыл мерекесімен құттықтады. Мерекелік сый-сыяпатты қабыл алған соғыс ардагері Жарқожа Наурызбайұлы көрсеткен ерекше ықыластары үшін жастарға ризашылығын білдіріп, шексіз алғысын жеткізді. 94 жастағы қария соғыс кезінде бастан кешкендерінен сыр шертіп, болашақ офицерлерге ақыл-кеңестерімен бөлісті. Отан қорғау жолында аянбай еңбек етіп, отансүйгіштіктің үздік үлгісін көрсетіп өмір сүруді аманат етті. Соғыс оты шарпып тұрған 1942 жылы Асқарбаев Жарқожа 18 жаста еді. Шақырту қағазы келе салысымен оны алдымен Өзбекстандағы Ферғана қаласына, он күннен соң Сталинград түбіндегі майданға жіберген. Польша, Чехословакия, Францияны босату операцияларына қатысып, Германияға ту тіккендердің сапында болған. Кейін Жапонияда болған соғыста ерлік көрсетіп, соғыстан «майор» шенінде оралған. Соғыста көрсеткен ерен ерлігі үшін орден-медальдармен марапатталған. Жарқожа атаның айтуынша, Жамбыл облысы Қордай ауданы Ворошил ауылынан 14 адам соғыс қатарына алынып, солардың төртеуі ғана еліне аман қайтқан. Өз кезегінде, болашақ офицерлер майдан даласында ерлік көрсеткен майдангерлердің өмірі батылдық пен қайсарлықтың үлгісі екенін жеткізді. Фото: РЭжБӘИИ баспасөз қызметі.

Көксу ауданында 50 пәтерлі үй пайдалануға берілді

Көксу ауданы Балпық би кентінде Береке шағынауданында 50 пәтерлі үй пайдалануға берілді, деп хабарлайды TINFO.KZ. Пәтерлердің 10 үйі ата-анасының қамқорлығынсыз қалған балаларға, 12 үйі көпбалалы аналарға, ардақты ана, алтын алқа иегерлеріне 5 үй, дәрігерлерге 2 үй, жанұясында мүгедек баласы бар отбасыларға 5 үй, I ,II топ мүгедектеріне 5 үй, зейнеткерлер мен жалғыз басты аналарға 11 үйдің кілті табысталды. «Жылдан-жылға көркейіп келе жатқан аудан орталығында бүгінгідей жаңа көп қабатты үйлер көптеп бой көтеріп, қоныс тойын тойлайтын тұрғындар қатарының көбейе түсетіндігіне сенім мол. Биылғы жылдың өзінде ауданда  2917 шаршы метр тұрғын үй пайдалануға берілді», - деді аудан басшысы Алмас Әділ. Жыл басынан осы бағдарлама аясында 41 отбасы баспаналы болып, тағы 7 отбасыға жаны жомарт жандар баспана сыйлады. Жалпы ауданда баспана кезегінде 828 адам тұр. Қаңтар айында 20 пәтерлі тұрғын үй пайдалануға беру жоспарланып отыр. 2020 жылы 20 және 60 пәтерлі тұрғын үй құрылысы жүргізілетін болады. Фото: Көксу ауданының әкімдігі.

Сарқанда аудан әкімі ардагерлерге құрмет көрсетті

Жаңа жыл мерекесі қарсаңында Сарқан ауданының әкімі Марат Разбеков аудан ардагерлерімен кездесті, деп хабарлайды TINFO.KZ аудан әкімдігіне сілтеме жасап. Өңір басшысы ғасыр жасаған қарияларымыздың қал-жағдайларын сұрап арнайы барып, келіп жеткен Жаңа 2020 жылмен құттықтап, сыйлықтарын табыстады. Марат Разбеков алдымен Шекарашы, Қарғалы ауылында тұратын ҰОС ардагері Геннадий Ульянов және Алексей Галкиннің шаңырағынан бастап, Қойлық ауылында тұратын ҰОС ардагері тоқсан жастан асқан Берлібек Ысқақовпен кездесті. Өңір басшысы «Ардагерлер үйінде» бас қосқан ардагерлер қауымын жаңа келе жатқан тышқан жылымен құттықтап, ізгі тілегін ақтарды. «Құрметті ардагерлер қауымы Сіздерді келе жатқан Жаңа 2020 жылмен кіршіксіз көңіл, ыстық ықыласпен құттықтаймыз! Келер жылда отбасыңызға құт-береке, қызметіңізге өрлеу тілейміз. Денсаулығыңыз күйлі-қуатты, бақытыңыз баянды, көңіл-күйіңіз тамаша болсын. Алдағы жыл Сіздерді тек оң өзгерістерімен, ұмытылмас сәттерімен, қызықты кездесулерімен қуантсын», - деп атап өтті Марат Разбеков. Фото: Сарқан ауданының әкімдігі.

Кербұлақ ауданы әкімінің орынбасары тағайындалды

31 жастағы Бекзат Мыржиев Кербұлақ ауданы әкімінің орынбасары болып тағайындалды, деп хабарлайды TINFO.KZ. Осыған дейін ол Кербұлақ ауданы экономика және бюджеттік жоспарлау бөлімінің басшысы болып қызмет атқарды. Бекзат Мыржиев Т. Рысқұлов атындағы Қазақ экономикалық университетінде «Қаржы бакалавры» мамандығын және «Алматы» Университетін «Құқықтану» мамандығы бойынша тәмамдаған. Еңбек жолын 2009-2012 жылдары аралығында Жамбыл аудандық экономика және бюджеттік жоспарлау бөлімінің жетекші маманы болып бастаған. Жамбыл және Қарасай аудандарында округ әкімі қызметін атқарған. 2015-2016 жылдары Алматы облысы әкімінің бірінші орынбасарының көмекшісі, 2018-2019 жылдары Алматы облысы кәсіпкерлер палатасының Кербұлақ ауданы филиалының директоры, 2019 жылдың ақпан айынан бастап Кербұлақ ауданы экономика және бюджеттік жоспарлау бөлімінің басшысы болып жұмыс атқарды. Фото: Кербұлақ ауданының әкімдігі.

Алматы облысында қызметте қаза болған полицейлердің балаларына арнап Жаңа жыл ұйымдастырылды

Алматы облысының полицейлері қызметтік борышын атқару кезінде қайтыс болған әріптестерінің отбасыларына барып, балаларына мерекелік көңіл-күй сыйлады. Облыстық полиция департаментінің бастығы, генерал-майор Мұрат Ұрұмханов бүлдіршіндерге жаңа жылдық сыйлықтар табыстап, Талдықорған қаласында «Жастар» спорт кешенінде өтетін мерекелік шараға арнайы шақырды», деп хабарлайды TINFO.KZ облыстық ПД баспасөз қызметіне сілтеме жасап. Облыстың бас полицейі Мұрат Ұрұмханов пен оның орынбасары Ораз Жолдасов 2006 жылы қылмыскерді полицияға жеткізу кезінде қаза тапқан полиция аға лейтенанты Алмас Әлиновтің, 2008 жылы қарулы қылмыскерді ұстау кезінде қаза тапқан Ғалым Тәттімбетовтің және 2013 жылы қарулы қылмыскерді ұстау кезінде қаза тапқан арнайы жасақ сарбазы Ержан Ахметовтің отбасына кіріп, бүлдіршіндерге әкелерінің ерлік істері туралы айтты. Полиция генералы қызметкерлердің батырлығы үшін отбасына алғысын білдіре отырып, балаларына әкелерінің іс-әрекеттерін мақтан тұтып, олардың білімді әрі тәртіпті болуы керегін атап өтті. Алматы облысы полицейлерінің балаларына арналған «генерал шыршасы» 200 астам баланың басын біріктіріп, бүлдіршіндерге шаттық сыйлады. Әсем безендірілген залда әдемі киінген Аяз ата мен Ақшақар өнерлі балаларға елді тәнті етуге мүмкіндік берді. Жаңа жылдық шарада бүлдіршіндерге арналған ертегі қойылып, әр жылдың иесі өз маңыздылығын көрсетті. Әдемі әндер айтылып, билер биленді. Жаттаған тақпақтарын айтып, Аяз атаның көңілін тапқан балалар тәттілерге ие болды. мерекелік кештің соңында балалар Аяз атаның қолынан тәттіге толы қалталарды алды. Фото: облыстық ПД баспасөз қызметі.

Талдықорғанда Президенттік шырша өтті

Облыс орталығында жыл сайынғы дәстүр бойынша Президенттік шырша мерекесі өтіп, оған облыстың түкпір-түкпірінен 200 бала қатысты, деп хабарлайды TINFO.KZ Алматы облысы әкімінің баспасөз қызметіне сілтеме жасап. Атап айтқанда, мерекелік шараға ата-анасының қамқорлығынсыз қалған балалар, жетім балалар, аз қамтылған отбасының балалары, үздік оқитын, республикалық және халықаралық оқушылар олимпиадаларында, спорттық жарыстарда жетістікке жеткен балғындар келді. Оларды Жаңа жыл мерекесімен Алматы облысының әкімі Амандық Баталов құттықтады. «Алтынай», «Талдықорған әуендері» би ансамбльдерінің және Қапшағай қалалық балалар шығармашылығы орталығының өнерпаздары Ақшақар биін орындап, Жаңа жылдық шырша тойының шымылдығын ашты. Талдықорғандағы №42 балабақшаның бүлдіршіндері тақпақ айтып, жаңа жылдық шашу шашылды, көңілді әндер орындалды. Балаларды Жаңа жылмен облыс әкімі Амандық Баталов құттықтады: «Құрметті балалар, ата-аналар, педагогтар, жыл сайынғы Президент шыршасына қош келдіңіздер! Бүгінгі мерекеге оқуда, спортта, ғылыми, шығармашылық ізденісте жетістіктерге жетіп жүрген озат балалар облыстың әр қиырынан шақырылды. Бұл шара – жас ұрпаққа арналған Жаңа жылдық сыйымыз. Осы жарқын сәттер естеріңде ұзақ сақталады және алдағы жаңа жылды жақсы көңіл күймен қарсы алуға септеседі деп ойлаймын. Мемлекет сендерге үнемі қамқорлық көрсететіп келеді. Жақсы оқыңдар, үлкенді сыйлаңдар, Отанымызды мақтан тұтыңдар, сонда біздің Қазақстанымыз үлкен жетістіктерге жетеді. Жаңа 2020 жылмен құттықтай отырып, сендерге мықты денсаулық, шат көңіл, бақытты ғұмыр тілеймін! Әрқашан толайым табыстарыңмен бізді қуанта беріңдер!». Текелі қаласындағы № 8 орта мектептің 5 сынып оқушысы Ернұр Сұлтанбек, Талдықорғандағы № 16 мектеп-гимназияның 3 сынып оқушысы, «Айналайын» балалар үйінің тәрбиеленушісі Анастасия Степанова осындай көңілді шара ұйымдастырған азаматтарға балалық жүрекпен алғыстарын айтты. Қол ұстасқан балалар шыршаны айналып, хормен ән айтты, би биледі. Шоу-бағдарламаға балалар қуана қол соқты. Олар Аяз Атамен бірге әлемнің көптеген елдеріне саяхат жасап, Жаңа жылды тойлаудың түрлі салт-дәстүрлерімен танысты, жаңа жылдық ойындар ойнады. Цирк әртістерінің, гимнастика шеберлерінің, фокусшылардың, жонглерлердің қызықты көрсетілімдері балаларға ерекше сыйлық болды. «Алға, жастар!» флешмобы мерекелік концертті түйіндеді, шара соңында дастархан жайылып, балалар тәттілерден дәм татты. Осы күні Президент шыршасына қатысқан әрбір балаға сый ретінде қыстық киім мен аяқ киім, спорттық форма, кроссовки, жаңа жылдық тәттілер, құттықтау хат, қазақ және орыс тілдеріндегі «Абайдың қара сөздері» кітабы берілгенін атап өтуге болады. Фото: Алматы облысы әкімінің баспасөз қызметі.

Сарқандық кәсіпкерлер 156 балаға тосын сый жасады

Сарқан ауданында Жаңа жылдың қарсаңында «Амина» мейрамханасының иесі Ася Валентиновна және «Абдрахимов» шаруа қожалығының басшысы Мират Хаматайұлы көп балалы және толық емес отбасыларда тәрбиеленіп жатқан ұл-қыздарға мереке ұйымдастырды, деп хабарлайды TINFO.KZ. Балаларға мерекелік ақ дастархан жайып, жасыл шырша ұйымдастырылып, ерекше сый жасалды. Мерекелік бас қосуда аудан әкімі аппаратының басшысы Бауыржан Абибеков келіп жеткен жаңа жыл мерекесімен құттықтап, балаларға жүрек жарды тілектерін арнады. Мейрамхана ұжымы балалардың көңілдерін көтеру мақсатында әуезді әндер, қызықты ойындармен, ғажайыпқа толы әсерлі кеш ұйымдастырды. Айта кетейік, жасыл шырша мерекесіне 156 қатысып, барлық балаларға тәтті сыйлықтар мен ойыншықтар үлестірді. Фото: Сарқан ауданының әкімдігі.

2020 жылы Алакөл ауданында 8 өндіріс іске қосылады

Бұл туралы аудан әкімі Әлібек Жақанбаев мәлімдеді. Өңір басшысының айтуынша, келесі жылы «Алакөл Агро» серіктестігі құны 700 млн теңгені құрайтын  5 000 басқа арналған ұсақ мал және 1,9 млрд теңгені құрайтын «Қайыңды» серіктестігі 20 000 басқа арналған ірі қара малын  бордақылау алаңын қолданысқа беруді жоспарлап отыр. Сонымен бірге, «Қайыңды» серіктестігі қуаттылығы күніне 20 тонна ет өңдеу цехін, «Голд ФИШ» серіктестігі  1,5 тонна балық өнімін өндіретін балық өңдеу зауытын іске қосады. 2020 жылға қарай жылына 5 мың тонна майлы дақылдарды өңдейтін «Алакөл май» серіктестігінің май өңдеу зауытын қайта жаңғырту жоспарланған. Сонымен қатар «Дидар и К» серіктестігінің итальяндық технология бойынша ұн тарту кәсіпорны, «Себепов» серіктестігінің темір бетон өнімдерін шығару кәсіпорны және «Лепсинск өнімі» серіктестігінің джем, варенье шығаратын желісі іске қосылады.   Фото: Интернет.        

Сарқанда ауыл шаруашылығы қызметкерлерінің күні аталды

Сарқан аудандық мәдениет үйінде ауыл шаруашылығы қызметкерлерінің күні салтанатты түрде аталып өтті, деп хабарлайды TINFO.KZ. Салтанатты жиында аудан әкімі Марат Мелісұлы сала қызметкерлерін кәсіби мерекелерімен құттықтап, жұмыстарына табыс тіледі. Шара барысында ауыл шаруашылығы саласында жоғары көрсеткішке қол жеткізген Алмалы ауылдық округінің әкімі Асқар Жүнісұлына аудан әкімінің ауыспалы кубогы табысталып, «Үздік округ әкімі» атағын иеленді. Сонымен қатар, ауыл шаруашылығы саласы бойынша ағымдағы жылдың он бір айында атқарған жұмыстарына сәйкес, Бас жүлдені Қарабөгет ауылдық округі, бірінші орынды Сарқан қаласы, Көктерек ауылдық округі екінші орынды, ал Аманбөктер ауылдық округі үшінші орынды мүсе тұтты. Жиында мал, егін шаруашылықтары бойынша да үздік шаруа қожалықтар, кәсіпорындар мен озық кооперативтер ұжымдарына Алматы облысы әкімінің Құрмет, алғыс хаты және аудан әкімінің алғыс, құрмет грамоталары табысталды. Тәуелсіздік мерекесіне орай ауданымыздың тумасы, ауданымыздың құрметті ардагері Рахимжанов Шакрат атамыз «Кәсіподаққа сіңірген еңбегі үшін» орденімен награтталды. Шара соңында аудандық мәдениет үйінің өнерпаздары мерекеге орай ұйымдастырған концерттік бағадарламасына ұласты. Айта кетейік, ағымдағы жылы аудан бойынша аграрлық секторда 42 млрд. теңгенің өнім өндірілген. Фото: Сарқан ауданының әкімдігі.

Жетісулық кәсіпкер қойылымның барлық билеттерін сатып алып, халықты тегін кіруге шақырады

Алматы облысының кәсіпкері Талғат Абдрахманов Бикен Римова атындағы драма театрының бір қойылымының барлық билетін өз қаражатына сатып алып, көрерменді театрға тегін кіруге шақырып отыр. Бұл туралы театр өкілдері өңірлік коммуникациялар орталығында өткен баспасөз мәслихатында мәлімдеді, деп хабарлайды TINFO.KZ. Брифингке Алматы облыстық Бикен Римова атындағы драма театры директорының орынбасары Ғалия Әмірхамзақызы, театрымыздың әртісі Ерлік Қалибек және кәсіпкер Талғат Абдрахманов қатысты. Бар ғұмырын заң-құқық саласына арнаған Жетісудың перзенті, Кербұлақ ауданы Шоқан ауылында туған Талғат Ахметұлы жұма, 20 желтоқсан күнгі «Бір түп алма ағашы» әлеуметтік драмасының қойылымның барлық билетін өз қаражатына сатып алып, талдықорғандық және қала қонақтары мен қала маңында тұратын келуге мүмкіндігі бар барлық көрерменді тегін кіруге шақырып отыр. Талғат Ахметұлының айтуынша өзінің жеті жасында ауылына барған театр қойылымынан алған әсері. Бала болса да көргенін көңілге түйіп, сол кезден таетрға сондай аңсары ауған екен. Ер жетіп есейгенде басқа саланың маманы болса да мүмкіндігінше театрдан қол үзбеген. Ал дәл осы қойылымды осыдан оншақты жыл бұрын ауыл азаматтарының басын қосып, туған жеріндегі ел-жұртына апарып көрсетіпті. Өз кезегінде Ғалия Әмірхамзақызы қанша жылдан бері қойылып келе жатса да, спектакльдің көрермені азаймағанын, қай елді мекенге барса да жұрт керемет сезіммен қабыл алып, ой түйіп қайтатынын, сол үшін де театр репертуарында әлі күнге дейін келе жатқанын атап өтті. Ерлік Қалибек те өз рөлінің ерекшелігіне тоқтала келіп, ерке күйеу бала болғанымен осы образ арқылы біраз мәселенің айтылатынын жеткізді. Фото: Өңірлік коммуникациялар орталығы.

Ұйғыр ауданында амбулатория ашылды

Алматы облысы Ұйғыр ауданы Қалжат ауылында дәрігерлік амбулатория ашылды, деп хабарлайды TINFO.KZ. Жаңа амбулаторияда 12 қызметкер жұмыс істейді. Дәрігерге дейінгі қабылдау, терапевтік, педиатриялық, егу, емшара, хирургиялық эәне тағы басқа кабинеттер бар. Аға дәрігер Саутахун Масутов айтуынша, дәрігерлік амбулатория заманауи жабдықтармен жабдықталған және ауыл тұрғындарына білікті медициналық көмек көрсетуге арналған. Аталған нысанды салуға облыстық бюджеттен 170,2 млн теңге бөлінген. Фото: Ұйғыр ауданың әкімдігі.